Saturday, 7 August 2021

குறுங்கதைகள்-பாம்பின் கால்





அவள் அருகே நெளியும் குளிர்ச்சியான கறுப்பும் நீலமும் கலந்த சிறுகோடுகள், புள்ளிகள், வளைவுகள் கொண்ட அந்தப் பாம்பின் தோல் அவளுக்கு மிகவும் பிடித்தது. அந்தப் பாம்பைத் தொடவேண்டும் என ஆவல் கொண்டாள். அவளை நோக்கி அது சீறியது. அவள் நகர்ந்து கொண்டாள். உன் தோல் மிகவும் அழகாக இருக்கிறது. நான் உன்னுடன் இருந்துவிடட்டுமா என்று கேட்டாள். நீ மனித இனம் உன்னுடன் நான் வாழ்ந்தால் என் இனம் என்னைச் சேர்க்காது என்றது அது. யாருக்கும் தெரியாமல் உன் புற்றுக்குள் நான் இருந்துகொள்கிறேன். உன் இனம் உறங்கும் போது பழங்களைப் பறித்து நான் உண்டுவருகிறேன் என்றாள். அவளுக்காக மனம் இரங்கி தன் புற்றில் வாழ இடம் கொடுத்தது. அடுத்த நாள் அவள் பழம் பறிக்கச் சென்றாள். அவள் வர காலதாமதம் ஆனது. பாம்பு பெரிதும் கவலையுறத் தொடங்கியது. தான் மனித இனத்தின் குணாம்சத்திற்கு மாறி வருவது போல் தோன்றியது. இதை உடனடியாக முடிவுக்குக் கொண்டு வர எண்ணியது. அவள் திரும்பி வரும்போது ஒரே கொத்தாக கொத்தி அவளைக் கொன்று விடவேண்டும் எனத் திட்டமிட்டது. அவள் பாம்புக்காக எலிகளையும் தவளைகளையும் பிடித்துக் கொண்டுவந்திருந்தாள். பாம்பால் அவளைக் கொல்ல முடியவில்லை. அவள் நிம்மதியாக உறங்கினாள். பாம்புக்கு இருப்புக் கொள்ளவில்லை. தான் மனித குணாம்சத்திற்கு மாறிக் கொண்டிருப்பது தன் இனத்திற்கு ஆகாது. தன் இனம் தன்னைப் புறக்கணிக்கப் போவதைப் பாம்பால் ஏற்கமுடியவில்லை. புற்றை விட்டு வெளியே வந்தது. தூரத்தில் கிரி ஒன்று நிற்பதைப் பார்த்தது. வேகமாகச் சென்று அதன் காலடியில் விழுந்தது.

 

 

குறுங்கதைகள்-வாசகம்





மீண்டும் தலைக்குள் அந்த வாசகம் வந்து கொண்டே இருந்ததால் மனநல மருத்துவரைப் பார்க்கக் கிளம்பினான். மருத்துவர் அவனைச் சோதித்தார். என்ன வாசகம் வருகிறது என்று கேட்டார். இவனால் அதைச் சொல்ல முடியவில்லை என்றும் குறியீடுகளாக இருப்பதாகவும் சொன்னான். மருத்துவர் மனவசிய சோதனைக்கு உட்படுத்தினார். அப்போது அவனிடம் ஒரு தாளையும் பேனாவையும் கொடுத்து எழுத வைத்தார். அதில் அவன் கீழ்க்கண்ட வாசகத்தை எழுதினான்:

௩ ௨௰௮ ௨௰௪. ௰௩௨ ௨௰௭ ௰௭. ௰௭ ௨௰௫ ௨௰௧௩ .

௨௰௮௭ ௰௮. ௰௮௪ ௰௩. ௰௩௩ ௨௰௬ ௰௩ ௨௰௮௨ ௰௪௩

இவை எல்லாமே தமிழ் எண்கள் என்பது மட்டும் அவருக்குப் புரிந்தது. இவற்றைக் கொண்டு அந்த வாசகத்தை எப்படிக் கண்டுபிடிப்பது என்று யோசித்து அவனை ஒரு  வாரம் கழித்து  வரச் சொன்னார். அந்த வாசகத்தைக் கீழ்க்கண்ட வகையில் பிரித்தார். எண்களுக்கு நேராக தமிழ் எழுத்துகளை முதலில் எழுதிக்கொண்டார். அதன் பின் அவனுடைய வாசகத்திற்கு நேராக அந்த எழுத்துகளை எழுதினார்.

௩-3-இ

௨௰௮-28-வ

௨௰௪.-24-ன் (அருகில் இருக்கும் புள்ளி அந்த எழுத்தின் புள்ளியாக இருக்கும் எனக் கருதினார்)

௰௩௨-13+2-க+ஆ-கா

௨௰௭-27-ல

௰௭.-17-ப்

௰௭-17-ப

௨௰௫-25-ய

௨௰௧௩ .- 21+3-ண+இ-ணி .(இங்கு உயிர்மெய்யில் முடிவதால் அந்த எழுத்தின் புள்ளியாக இருக்காது. வாசகம் முடிவதற்கான புள்ளி என நினைத்தார்)

௨௰௮௭-28+7-வ+ஏ-வே

௰௮.-18-ற்

௰௮௪-18+4-ற+உ-று

௰௩.-13-க்

௰௩௩-13+3-க+இ-கி

௨௰௬-26-ர

௰௩-13-க

௨௰௮ ௨-28+2-வ+ஆ-வா

௰௪௩-14+3-ச+இ-சி

”இவன் காலப்பயணி. வேற்றுக்கிரகவாசி”.

என்ற வாசகம் வந்தது. அதனைப் பார்த்தவுடன் அவனைத் தொடர்புகொண்டு தன்னால் அந்த வாசகத்தின் பொருளை அறிய முடியவில்லை என்றும் அவனை வேறு மருத்துவரை அணுகும்படியும் சொல்லித் தொடர்பைத் துண்டித்தார்.

Friday, 6 August 2021

குறுங்கதைகள்-வண்டு





அவள் கை மீது ஒரு காட்டு வண்டு ஒன்று வந்தமர்ந்தது. அவள் அதைத் துரத்த கை ஓங்கினாள். என்னைத் துரத்தாதே என்றது. ஏன் என்றாள்.  நான் காட்டில் வாழ்ந்து சலித்துவிட்டதால் நாட்டுக்கு வந்திருக்கிறேன். என்னை இங்கேயே வைத்துக் கொள் என்றது. அதை ஒரு கூடையில் போட்டு வைத்தாள். இரவு அவளிடம் வந்து காட்டிலிருந்து உனக்கு ஏதாவது பழம் எடுத்து வருகிறேன். நாளை காலை உன்னருகில் பழம் இருக்கும் என்றது. அடுத்த நாள் அவள் கண் விழித்த போது பழத்துடன் வண்டும் அமர்ந்திருந்தது. இந்தப் பழத்தைச் சாப்பிட்டால் என்ன ஆகும் என்று கேட்டாள். தன்னைப் போல் இறக்கை முளைத்து பறக்கலாம் என்றது. அவள் இறக்கை முளைப்பதை விரும்பவில்லை. அப்படி என்றால் இந்தப் பழம் எனக்கு வேண்டாம் என்றாள். சரி நாளை வேறொரு பழம் எடுத்து வருகிறேன் என்றது. அடுத்த நாள் கொண்டு வந்த பழத்தைச் சாப்பிட்டால் என்ன ஆகும் என்று கேட்டாள். எதிர்காலத்தில் நடக்கப் போவதை முன்பே தெரிந்துகொள்ளலாம் என்றது. அதில் மயங்கி அந்தப் பழத்தை அவள் சாப்பிட்டாள். அடுத்த நாள் அவர்கள் இருக்கும் பகுதியில் ஒரு பெரிய நிலநடுக்கம் தாக்கும் என்று அவளுக்குப் புரிந்தது. இதை எல்லோரிடமும் கூறினாள். அவளுக்கு எப்படித் தெரியும் என்று கேட்க வண்டையும் அது கொடுத்தப் பழத்தையும் பற்றிக் கூறினாள். அவளுக்குப் புத்தி பேதலித்துவிட்டது எனக்கூறி மருத்துவமனையில் சேர்த்தார்கள். அவள் வண்டையும் எடுத்துப் போனாள். மருத்துவமனைக்கு வெளியே சென்று அமர்ந்துவிட்டாள். மருத்துவமனைக்குள் வரப் போவதில்லை என்று கூறிவிட்டாள். அடுத்த நாள் பெரிய நிலநடுக்கம் தாக்கியது. சுற்று வட்டாரத்தில் எல்லாமே அழிந்து போனது. அவள் வண்டை எடுத்துக் கொண்டு காட்டை நோக்கிப் புறப்பட்டாள்.

Thursday, 5 August 2021

குறுங்கதைகள்-கிரிகோர் சம்ஸா*வுடன் ஓர் உரையாடல்





 காஃப்காவின் கதையில் உருமாறிய கிரிகோர் சாம்ஸாவுடன் பேசிக் கொண்டிருந்தேன். அந்தக் கதையை விட்டு வெளியேற முடியவில்லை என்றான். பலரும் தொடர்ந்து அந்தக் கதையை வாசிப்பதால் அவர்களுக்காக அந்தக் கதையிலேயே இருக்க  வேண்டியிருப்பதாகக் குறைபட்டுக் கொண்டான். பூச்சியான பிறகு வாழ்வு தரும் சிக்கலை எப்படி பொறுக்க முடிகிறது என்றேன். உருமாறி இருப்பது குறித்து மகிழ்வு இருப்பதால் சாத்தியமாகிறது என்றான். அவனுடைய குடும்பமே அவனை ஏற்காத போது இன்னும் என்ன நம்பிக்கையில் வாழ முடிகிறது என்றேன். யாருமற்ற உலகில் பூச்சிகள் துணை நிற்பதாகச் சொன்னான். அவர்களின் வாழ்வில் இருக்கும் சிக்கல்களைத் தெரிந்து கொள்ள தன் வாழ்வு பயன்படுவதாக எண்ணி காலத்தைக் கடத்திக் கொண்டிருப்பதாகக் கூறினான். பூச்சிகளைச் சுலபமாக கொன்றழித்துவிடுகிறார்கள். அப்படி ஒழிக்கப்படுவோம் என்ற அச்சம் இருக்கிறதா என்றேன். மனிதனாக இருந்தால் மட்டும் என்ன எப்படியும் ஒழித்துக்கட்டி இருப்பார்கள். பூச்சியான மனிதன் என்ற வேடிக்கை பார்க்க விட்டுவைத்திருக்கிறார்கள். எல்லோரும் பூச்சியாக உருமாறிவிட வேண்டும் என நினைக்கிறாய் என்றேன். இல்லை அப்படி ஆகிவிட்டால் மனிதனாக உருமாறுவது குறித்து யாராவது கதை எழுதிவிடுவார்கள் என்றான். பூச்சியாகிவிட்டதால் மனித குணாம்சங்கள் மறைந்து சுமை குறைவது போல் இருக்கிறதா என்றேன். ஆம் பூச்சிகள் சுமையற்றவை என்றான். நான் உன்னை பூச்சியாக பார்க்க வேண்டுமா மனிதனாகப் பார்க்க வேண்டுமா என்று கேட்டேன். நீ பூச்சியாக மாறிவிட்டால் நன்றாக இருக்கும் என எண்ணுகிறேன் என்றான். பூச்சியான பெண் குறித்து நான் ஒரு கதை எழுதலாம் என நினைக்கிறேன் என்றான்.

* பிரான்ஸ் காஃப்கா எழுதிய உருமாற்றம் நாவலில் இடம்பெற்ற கிரிகோர் சாம்ஸா பாத்திரம் இங்கு மீண்டும் எடுத்தாளப்பட்டுள்ளது.

 

Tuesday, 3 August 2021

குறுங்கதைகள்-பொம்மை




(அமெரிக்காவில் ராபர்ட் என்ற பொம்மை அமானுஷ்ய தன்மை பெற்றிருப்பதாகக் கருதி அதை ஓர் அருங்காட்சியகத்தில் வைத்திருக்கிறார்கள். அதன் நினைவாக எழுதப்பட்ட கதை)


சிறுவன் போன்றிருந்த பொம்மை உயிர் பெற்றது. அந்தப் பொம்மையை வைத்திருந்த சிறுவன் பொம்மையானான். இந்த அதிசயம் நிகழ்ந்து கொண்டிருந்த போது சிறுவனின் தாய் ரயில் முன் பாய்ந்து இறந்துவிட்டிருந்தாள். அந்தப் பொம்மைக் கண்காட்சியில் கிடைத்தது. மிகவும் ஆசைப்பட்டு அந்தப் பொம்மையை வாங்கி வந்த சிறுவன் தன்னைப் போலவே உடை உடுத்தி உணவு கொடுத்துப் பழக்கிவிட்டான். பெரும்பாலும் அந்தப் பொம்மையுடனேயே நேரத்தைக் கழித்தான். உறங்கும் நேரமும் உடன் உறங்கியது பொம்மை. சிறுவனின் தாய்க்கு இது எந்த வேறுபட்ட நடத்தையாகவும் தோன்றவில்லை. சிறுவன் பள்ளிக்குச் செல்ல மறுத்து பொம்மையுடன் நேரத்தைக் கழிக்கத் தொடங்கினான். சிறுவனை உருட்டி மிரட்டி பள்ளிக்கு விரட்டினாலும் பாடங்கள் அவனுக்கு ஏறவில்லை. பொம்மையைப் பிரிந்த ஏக்கம் ஆட்டிப் படைத்தது. வீட்டில் பொம்மையுடன் பேசிப் பேசி நெருங்கிய நட்பை உருவாக்கிவிட்டான். நண்பர்களை மறந்தான். வீட்டை விட்டு வெளியே போகாமல் இருப்பதையே விரும்பினான். அதை அவனது தாய் விரும்பவில்லை. மகனைத் திருத்த ஒரு நாள் பொம்மையை ஒளித்துவைத்துவிட்டாள். மகன் பைத்தியமாகி அழுவதும் அலைவதும் அரற்றுவதும் காணச் சகிக்காமல் போனதால் மீண்டும் பொம்மையை எடுத்துக் கொடுத்துவிட்டாள். அதன் பின் பொம்மையை ஒரு நிமிடம் கூடப் பிரியாமல் இருந்தான் சிறுவன். அவனை வழிக்குக் கொண்டு வர பொம்மையை வைத்துக் கொள்வதால் அவன் கல்வியை மறந்து சீரழிந்து போவான் என எச்சரித்தாள். அந்தப் பொம்மை அவனை எல்லா சிரமங்களிலிருந்தும் காப்பாற்றும் எனச் சொல்லியிருப்பதாகக் கூறினான் மகன். தன்னைவிட அவனுக்குப் பொம்மை முக்கியமா என்று கேட்டாள். ஆம் என்றான் மகன். நாளை தான் இருக்கப் போவதில்லை, பொம்மை அவனைக் காப்பாற்றுமா என்று கேட்டாள். ஆம் என்றான். தாய் தன்னை விட்டுச் செல்வதை எந்தச் சலனமும் இன்றி பார்த்தான். பொம்மையாக மாறிக் கொண்டிருந்தான் அவன். சிறுவனாக மாறிவிட்ட பொம்மை அவனை வைத்து விளையாடிக் கொண்டிருந்தது. 

Monday, 2 August 2021

குறுங்கதைகள்-மயில் பெண்




மேல் பாதி பெண். கீழ் பாதி மயில். இப்படி இருக்கும் இவர்கள் மயிலின் எண்ணத்தைப் பெண்ணும் பெண்ணின் எண்ணத்தை மயிலும் வெளிப்படுத்திக் கொண்டிருந்தார்கள். அவர்களைப் போன்ற மற்ற உயிரினங்கள் ஏதும் இல்லை என்பதால் அவற்றுக்கு என தனி சிறப்பு இருந்தது. மற்ற உயிரினங்கள் இவர்களை மதித்தன. பெண்ணுக்கு மயிலின் குரல் பிடிக்கவில்லை. இருந்தாலும் அந்தக்  குரலில் பேசவேண்டியிருந்தது. மயிலுக்கு பெண்ணின் குணம் பிடிக்கவில்லை. மயில் தன் ஆட்டத்தைத் தொடர்கையில் பெண் வெறுத்தாள். அவள் பேசுகையில் மயில் வெறுத்தது. இருவரும் பிணைந்து இனி வாழ முடியாது என்ற நிலைக்கு வந்தார்கள். பெண் பிரிந்தால் அவளுடைய பாதியாக யார் இருப்பது என்ற போட்டி உருவானது. மயில் பிரிந்தால் அதற்குப் பாதியாக பல உயிரினங்கள் முன் வந்தன. இந்தப் பஞ்சாயத்தைத் தீர்க்க முருகனிடம் சென்றன. மயில் தன் பாதியாக மயிலிடமிருந்தே பெற்றுக் கொள்ளலாம். பெண்ணும் தன் பாதியாக மற்றொரு பெண்ணைப் பெற்றுக் கொள்ளலாம் எனத் தீர்ப்பளித்தான். சில நாட்கள் கழிந்தன. பெண்ணும் மயிலும் பிணைந்து இருந்த போது வந்த சண்டைகளை விட இப்போது அதிக சண்டைகள் வந்தன. மீண்டும் மயில் பெண்ணிடம் வந்து பழையபடி பிணைந்திருக்கலாம் என்றது. பெண்ணுக்கும் அது பிடித்திருந்தது. மீண்டும் முருகனிடம் சென்று முறையிட்டார்கள். இந்த முறை மயில் பெண்ணாகவும் பெண் மயிலாகவும் மாறிப் பிணைய முருகன் ஆணையிட்டான். மீண்டும் ஒரு போர் தொடங்கியது. 

குறுங்கதைகள்-அவளும் அவனும்






அன்றுதான் அந்தக் கதையின் 1000மாவது பக்கத்தை அவன் எழுதி முடித்திருந்தான். அந்தக் கதை அவன் விண்வெளிப் பயணம் போனதைப் பற்றியதுதான். அவனுடைய சுயபுராணம் என்றுகூடச் சொல்லிவிடலாம். விண்வெளியில் அவன் கண்ட காட்சிகள், கிரகங்கள், நட்சத்திரங்கள் எல்லாம் அந்தக் கதையில் இடம்பெற்றன. அவன் விண்வெளியில் அனுபவித்த ஒவ்வொரு மணித்துளியையும் கதையாக எழுதவேண்டும் என்ற வேகத்தில் அந்தக் கதையை எழுதிக் கொண்டிருந்தான். எல்லாமே நினைவில் இருந்து எழுதவேண்டியிருந்தது. எதையும் பயணத்தின் போதே பதிவு செய்ய முடியாதிருந்தான். அதனால் அந்தப் பயணத்தை மீண்டும் மேற்கொள்வது போல கதையில் பயணித்துக் கொண்டிருந்தான். முதல் அனுபவம் பற்றியே 1000 பக்கங்களை எழுதிவிட்டான். இது அவனுடைய முதல் விண்வெளிப் பயணம். முதலில் அவன் சென்றடைந்தது பூமியைப் போன்றே இருக்கும் ஒரு கிரகம். அங்கிருந்தவர்கள் பூமியைச் சேர்ந்தவர்கள் போலவே இருந்தார்கள். இவனும் அந்தப் புதிய பூமியில் மிகவும் இனிமையாக நாட்களைக் கடத்தினான். அங்கு ஒரு பெண் இவனுக்கு அறிமுகம் ஆனாள். அந்தப் பெண்ணிடம் தன்னைப் பற்றிக் கூறினான். அவளும் வேறொரு கிரகத்திலிருந்து வந்திருப்பதாகக் கூறினாள். அந்தப் புதிய பூமியில் இருக்கும் சிலரைத் தன்னுடன் அழைத்துச் செல்ல அங்கு வந்திருப்பதாக அவள் கூறினாள். தானும் அவளுடன் வருவதாகக் கூறினான். பூமியிலிருந்து வருபவர்களுக்கு தன்னிடத்தில் வாழ முடியாது என்று கூறினாள். அவள் தன்னை உருமாற்றிக் கொண்டு அந்தப் புதிய பூமிக்கு வந்திருப்பதாகச் சொன்னாள். பூமிவாசிகளுக்கு இப்படி உருமாற்றிக் கொண்டு வேறிடத்தில் வாழ்வது இன்னும் சாத்தியமில்லை என்றாள். அவளைப் போல உருமாற என்ன செய்யவேண்டும் என்று கேட்டான். அவனைப் போல அவளால் உருமாற முடியும் என்றாள். ஆனால் மீண்டும் அவன் தன் பழைய நிலைக்கு மீள முடியாது என்றாள். அதை அவன் பொருட்படுத்தவில்லை என்றான். தன்னைப் போல் உருமாறி அவளுடைய இடம் சென்று தான் எழுத நினைத்த இந்தக் கதையை எழுதினால் போதும் என்றான். அவள் அவனாக உருமாறி இந்தக் கதையை எழுதிக்கொண்டிருந்தான்/ள்.  

மா.அரங்கநாதன் படைப்புகளில் தோற்றமெடுக்கும் நனவுநிலை -சிறுகதை படைப்பாக்கத்தின் உள்ளார்ந்த கட்டமைப்பு

  (தினவு ஜூலை 2025ல் வெளியான கட்டுரை) எல்லா வகையான படைப்பாக்கங்களின் அடிப்படையும் நனவுநிலையின் தூண்டுதலாகவே இருக்கும் வாய்ப்பு அதிகம் உள்ளது...