அழித்தனன் அழிந்தனன்

கிறிச்சீடும் கிள்ளை மொழியோ பிறழும் ஆயுத ஒலிகேட்டு. வாளும் வேலும் பழஞ்சேனைகளுக்கானதால் புதிதாய் பொலியும் எடையில்லா பருமையும் கொண்டு விரைந்து நிகழும் ஆற்றல் உள்ளதுமான சிறு கை எந்திரம் படைத்து ஏமாப்பு கொள்ளத் துணிந்த கருமமதில்.

குருதி வழிந்த சிறு நீள் வட்ட உருளை கொழித்திருக்கும் இரும்பின் மணம் கலந்து நெகிழ்வைக் கூட்டிடும். செம்மையும் கருமையும் இறுகும் நீராய் திவலைகள் வீழ்ந்திருக்க. உயிர் பாய்ந்த சுவடுகள் தெறித்ததின் சான்றுகள் மறைந்த சதுக்கமாய் அவ்விடம் உறையும். ஆயுதம் ஒரு கணம் கண் சிமிட்டி நகைக்கும். மரணம் பறித்த உவகையில் துள்ளும். விசையிடம் கற்று வேகத்தில் பயின்று இலக்கை எட்டும் வித்தை தெரிந்ததில் அழிவும் அற்புதமாய் அடங்கிற்று. வினையும் எதிர்வினையும் அடர்ந்த இயல்பின் தன்மையாய் ரசம் ஆடிற்று. இன்மையாக்கலை நிகழ்த்திய கருவி வகை பிரிப்பில் சேரும். படைகலனின் மூலம் தேடி பாதை விரியும். கிளியும் குரலெடுத்து இயம்பும்:
1.சிறுகுறு வகை: குறை தூரம் கடக்க வல்ல ஆற்றல். குறி தாக்கும் துல்லியம். ஒரு கணத்தில் சில தசம அடி தாண்டும். பொருளில் படும் இடம்சார்ந்து எடை மாறும்.
2.சிறுபெரு வகை: நீட்டலும் இன்றி குறுக்கலும் அன்றி இடை பாயும். அடையும் எல்லை கழுகுக் கண் பாவை. நாழிகை நுனியில் பல தூரம் கடக்கும். நிலை எட்டும் அம்பின் கணையாய்.
3.நீள் வகை: கண் கொத்தும் குறிப்பை கணத்தில் சேரும் கலன். எதிர் நோக்கும் காணா இமைப்பில் மறையும். நிறை கூடும். தொகை பெருக்கும்.
4.இயங்கும் எடை வகை: குடி அழிக்கும் நோக்கில் மலையும் காடும் தாண்டி செயல்படும். குழுவாய் முயன்று தகர்க்கும். கோட்டையும் உடையும். இறுமாப்பு பெருக.

கிளி கடிந்தது வன்மத்தில். அலகும் கூர்ந்து செப்பும். மருளும் மாந்தர் பகை போக்க வெளி சமைத்ததோ. உந்தும் தள்ளும் உடன் மடியும் இரையதனை கண்ட துதி தேவையோ. சிறு குழவி கரம் பற்றினாலும் உறுதியாகும் சாக்காடு. பயனிலா போகமாய் ஆக்குவது ஏனோ.

கிளி விளி கேட்டு சினமும் இறுக்க வதியும் கூட்டை நொறுக்கும் ஆர்வம் கிளம்பும். உடன் கொஞ்சும். பைங்கிளி அகத்தின் ஈரம் காட்டும். மானமில் செயலதனை சுட்டும். கிளியைக் கொல்ல ஆயுதம் ஏந்திய வீரமோ என இளிவும் தாக்க முதிரா சலிப்பு சேரும்.

தத்தை மீண்டும் தொடரும். கொலைத் தொழில் நடந்தேறும் குறிப்பதனை உற்று நோக்கும். துறவின் மாட்சிமை பொருந்திய மூப்பின் உடல் சிதைந்ததை சொல்லி விழிநீர் பெருக்கும். மதம் மயங்கிய களிற்றின் நிலை போல் அழுத்தும் அலகை பற்றியதும் மாறிய தீரத்தை கண்ணுற்ற பிணி தீருமோ.

ஆயுதம் தாங்கிய மரணம். உயர் இடம் மாறி திடமாய் வல்லடியுறும். நிகழும் எனும் நேரம் சார் பொருளை மறு உருவாக்கல் செய்யும். விதிகளில் சிக்காமல் துடிப்பை நிறுத்தும் சங்கதி அறிய. ஆளும் பிம்பம் மறைய. கூர்மை சிதைக்கும் ஆடியை. நொறுங்கும் கண்ணில் உடல், பொருள், ஆவி இழக்க.

இறப்பும் உயிர்ப்பும் வேகத்திலும் கூர்மையிலும் குறிபார்த்தலிலும் இறுதி காணும் திடுமென்று உயிர்த்தலற்ற பொழுதும் எட்ட. உந்தித் தள்ளிய உந்தலின் வேட்கை உயிரின் விருப்பம் அறிந்திருக்க.


கொடியதாய் குத்தியும் கிழித்தும் உட்புகும் திறத்தினதாய் திடம் கொண்ட உலோகம் இயங்க. சிறுபொறி பறக்கும். ஒலியும் வெடிக்கும். தூரத்தின் வகையில் சாவும் இடம் செறிந்து
1.முனைதள்ளி: அணுகலும் அகலலும் இன்றி மத்தியில் நிலை கொண்டது.
2.முனையவெளி: குறுகிய இடைவெளியில் ஸ்திரமானது.
3.முனைபுள்ளி: வெளிப்பட்டவுடன் வாகை சூடும் இடம் பற்றியது.

கணத்தில் பொழியும் பண் நிறை கோளங்களை அரசனும் பவனி வர துளைத்தது ஒன்று. விழி நீர் பெருக்கி துவண்டனன் சிறு கொடியாய். படையும் அறியவில்லை காரணமும். முன் செலுத்தும் வித்தை கொண்ட மாயவகை சார்ந்த திட்டமதில். எஃகின் வலி பெருக்கும் கூர்மை விசையது. பேய் வெண்தோல் பிளந்து செவ்வரி ஓடி ஊற்றெடுத்தது. அதிர்ந்த துளிகள் தெறித்தன அங்குமிங்கும். நீரன்ன வெம்மையில் திரண்ட ஒழுகலாய். கொட்டும், ஊற்றும் செம்புனலென. மண்ணுடன் தான் கலந்த கறையாக செங்களம் விரித்து ஈர்க்கும். நாறும் மணம் புலவித் திறத்தை புகைத்தது. வெறியின் பித்தாய் வீசியது. காற்றும் கலந்து இறுகியது. நீர்த்ததும் வளி போன்றதும் வெளியேறியதில் கலந்தது துடிப்பு. விழி காணா படலம் ஆவியின் வெம்மையாய் பரவும். வலிந்து பறித்த ஆற்றலும் நகைத்து கோண. முள்ளன்ன தொடுவலி உணரா மேன்மை பொறிகொண்ட பேரானந்தமாய்.

ரௌத்திரம் பழகிய கிளி செய்வதறியா பதைப்பில் மிழற்றி களிப்பும் பொங்கும் உவகை போல் கொப்பளிக்கும் சுரப்பும். செந்நிறம் பெற்று அனல் கொண்டு தகிக்கும். வேறு இடமும் புதிய கணமும் நேர்வித்த விளைவில். பல்லுயிர் பெருக்கி எண் கொடுக்க. உருள் திரள்கள் எத்தனை எத்தனை என விண்மீனாய் சிமிட்டும். அரசும் வீழ கொடியும் காய, ஆதியின் மகனும் வாழா நிலையதனை காணவும் உளதோ இன்னும். இனிக்கும் சுவை கூட்டும் நிலையற்ற வாழ்வதனில் இருப்பதும் இருப்பதான கருத்துமாய் இடையீட்டில் ஊசலாடி மௌனம் கவ்வும் சூதில் முற்றும் பெற ஆகிவந்த கருவி.

பிள்ளைப் பட்சி தீட்டும் உபாயம் மறைபொருளாய் விளங்கிற்று. எப்படியும் அக்கருவி எடுத்து பறந்தோடும் வித்தை ஒன்றை புனைந்தது அது. தன் இனம் சேர்த்து படை திரட்டி மீளும் திறமாய் அது இருக்க. பழி தீர்க்கும் மோகம் உன்மத்தமாகி நுடங்கும்.

கிளி உடைத்தது கூடு. தேடிப் பறந்ததது கலனுக்காக. அவள் இடம் வந்து சேர கண்டது காட்சியை.

தந்தையும் தனயனும் தலைவனும் வெற்றுடம்பாய் நீண்ட பொழுதில் தன் உறவு விடுத்த அவள் மயங்கும் புலனாய் கொண்ட கலன். நன்றி உணரா நன்றறிந்து அழுத்திய பொறியில் நில்லாது பொழிந்த கூர் வட்டுகள் சாய்த்தன விநாடியில். தீதும் இன்றி தீயதாய் உருவமைந்த எதுவும் இன்றி நன்றாய் மாறிய திறமும் இன்றி.

ஆய்ந்தறிந்து தகவமைத்த சான்றோனும் மரண ஆட்டம் முடிவிலா தொடரானதாய் ஆற்றாமல் தன் பெயர் ஈந்த கருவியை ஒழிக்கும் புது விடை காணாது திரும்ப, கிளி அழுத்தி விசை தெறித்து மூச்சையும் நிறுத்தினனே.

பெண்:புராணம்-பிளவு-தன்னிலை:இறுதிப் பகுதி

3.தன்னிலை

சுயமானது தன்னிலையாக கட்டப்படும் என்றும் மற்றமையாக அது வெளிப்படும் என்றும் நனவிலியை மையமிழக்க வைத்து சிதைவடைந்த உடலை தந்தைமை கலாச்சாரத்தில் புனைவதை உறுதிப்படுத்தும் என்றும் கூறி பெண்மையின் தன்னிலையை காணாமல் செய்துவிட்ட உளவியல் ஆய்வும் உண்டு. மணம் செய்யாத பெண் உடல் பொருளற்றிருப்பதாக பயனிற்றிருப்பதாக அறவுரை வழங்கப்பட்டு விதிகளை பெருக்கிய பல நூற்றாண்டு பெண்மையின் தன்னிலையும் பேசும். பெண் தன்னிலை அது கட்டப்படுவதற்கு முன்பான விதிகளால் ஆளப்பட்டிருக்கும்[1]. சமூக வாழ்நிலையில் வாழமுடியாத, வாழ இயலாத தன்மையையும் கொண்டிருக்கும் தன்னிலை என்ற பரப்பில் தனித்த உயிராக நிலை பெற்ற, விலக்கப்பட்ட, உள்ளிருப்பாக மாறும் பெண்மையின் ஒழுங்கமைவு, பால் என்ற பதத்தின் தளத்திலிருந்து கொள்ளப்பட்டிருக்கலாம்.

பாலின் மதிப்பு பாலினமாக இயல்பாக்கப்பட்டிருக்கிறது. பால் என்பது கலாச்சாரத்தில் பாலினமாக மறுதலிக்கப்பட்டிருக்கிறது. இதனால் பாலை நேரடியாக புரிந்துகொள்ளப்படுவதை விட பாலினமாக புரிந்துகொள்ளப்படுவதுதான் நடப்பில் இருக்கிறது. பால் ஒரு கதையாக அதீத கற்பனையாக புனைவாக இருப்பதாகக் கொள்ளப்பட்டிருக்கிறது. தன்னிலை என்பது பாலின உறவில் பிணைந்து வருகிறது. பாலினமாக கொள்ளப்படுவது முதலில் தன்னிலைக்கு முன்பாக செயல்பட்டு அது கோரும் தன்னிலையாக பாவிக்கிறது. மனிதம் உருவாவதற்கு முன்னரே பாலினம் செயல்பட்டுவிடுகிறது. பாலினமாக பெயரிடப்படுதலே பாலின விதிகளை நிர்ணயித்துவிடுகின்றது. மொழி அல்லது சமூகம் அல்லது மொழியாடல் தன்னிலையில் பிரதிபலிக்கும் போது தன்னிலையின் மீமெய்யியல் வலுப்படுகிறது. இங்கு தன்னிலை கட்டப்படுவதாக கொள்ளப்பட்டால் இந்த கட்டமைப்பில் தன்னிலையும் அதன் செயல்பாடும் தோற்றம் கொள்வதாக வலியுறுத்தப்படுகின்றன. இந்த வலியுறுத்தலில் பால், உற்பத்தியும் செய்யப்படுகிறது; உறுதியின்மையும் ஆகிறது.

பெண்மை என்பது பொருளாம்சத்திற்கும் பொதுமைக்கும் பிரதிநிதியாக ஆக்கப்படுவது சிக்கலானதல்ல. மாறாக பெண்மை உருவுக்கும் பொளுக்கும் பொதுமைக்கும் தனிப்பட்டதற்குமான இருமைகளுக்கு வெளியில் இருப்பதால் சிக்கலாகிறது[2].

சதை தொகுப்பின் அம்சமாக பெண் தன்னிலை வார்க்கப்பட்டிருக்கிறது. அல்லது சதை தொகுதிகளாக சதை பிண்டங்களாக பெண்மை பழக்கப்படுத்தப்பட்டிருக்கிறது. வளையல்களாகவும் அவற்றின் ஒலிகளாகவும் அவற்றை அணிவதன் மகிழ்வாகவும் அவற்றின் வரலாறாகவும் அவற்றின் உறுப்பாகவும் பிளக்கப்பட்டிருப்பதை நுண்மையுடன் மறைக்கப்படும்[3] இடங்களும் உண்டு. பொருள்வயின் பிரிந்தாலும் போர்வயின் பிரிந்தாலும் உடல் மெலியும் நலியும் காமத்தின் பாற்பட்ட பிரிவாக மாற்றிப் பார்க்கும். பேராசை பிம்பமாகவும் குடும்பத்தின் இணைப்பு கண்ணியாகவும் அழும் கண்களாகவும் கணவன்களை பிணைத்திருக்கும் அங்கமாகவும் ஆண் துணை சேர் வாழ்வை பெரிதும் விரும்புவதாகவும் இருக்கும் பெண் தன்னிலையாக வகுக்கப்பட்டிருக்கும். பெண்மை என்ற உடல் பாலியல் தன்னிலையாக வேர்கொண்ட அழுத்தம்தான் புனைவாக பொருளாக சொல்லாக மொழியாக வரையப்படும். எதிர்பால் விழைவுகள் கொண்ட விதிகளுக்கு உட்படுவது, அருள் பாலிப்பதும் அருள் பெறுவதும் நிறைகொள் உணர்வாய் இருப்பது, என்று பெண் தன்னிலை உருக்கொள்கிறது. நகையும் பொய்யாய் உணர்ச்சியும் மிகையாய் செயற்கையும் பகட்டும் மீதூர பகடையாய் பரவசப்படுவதும் பெண் தன்னிலையின் பாவனைகள் புகலப்படுகின்றன. உடல் மேன்மை பாராட்டும் அரூபமாக பாவையாக பின்னியிருக்கும் பெண் தன்னிலை அதிர்ச்சியான இன்பப் பீறிடல்களையும் நிகழ்த்துகிறது அவ்வப்போது. சேலை கட்டும் அதியம் ராமர்களைத் தேடும் செயபாட்டுத்துவம், புணர்வின் மீறல்களை அடுக்கும் மயக்க பிதற்றல்கள் என பெண் தன்னிலை புதுக் கோணல்களைத் தீர்மானிக்கிறது[4]. மணபந்தம் மீறிய உறவுகளின் தேவைகளை நிர்ணயிப்பதும் உள் புழுங்கும் வேட்கையின் பொங்குதல்களை மடைமாற்றுவதும் தோற்பாவைகளின் நிழல்கூத்தாடிகளாய் மரபை இடமாற்றம் செய்வதும் பெண் தன்னிலையின் நெருக்கடிகளுக்கான பதில்களாக இருக்கின்றன. தெய்வம் தொழுது கொழுநன் தொழுது மழை பெய்விக்கும் இயற்கை விதி மீறிய ஒழுக்கம் புலன்சார் இறையாய் அடைக்கப்பட்டுவிட்டதால் இனி காமத்திலும் காயத்திலும் புரண்ட புழங்கிய வெளியாய் தன்னிலை விடுவிக்கப்படுகிறது. பொது உடலாக தனி உடல் தன்னிலையில் இணைக்கப்பட்டிருக்கிறது. பெண் என்பதே இல்லை என்ற முன்தீர்மானத்தில் தன்னிலையை கட்டமைப்பது லிங்கமையவாதத்தின் ஒழுங்கமைவுதான். அதனால் உருவாகும் பெண் என்பதே ஒரு பன்மைத்துவமாக கொள்ளப்பட்டால் இருமை பிளவை தவிர்க்க முடியும். எல்லா மனப்பிறழ்வுகளையும் இடிபல் முக்கோணத்திலிருந்து விலக்கிவைக்க முடியும். ஆனால் பெண் என்பதே பெண்மை என்ற விதிகளிலிருந்து கட்டமைக்கப்படுவதாக மாறுகிறது. பொம்மை விளையாட்டின் குழந்தையான சிறுமியிலிருந்து பெண் உடலாக மாற்றம் பெறுவதைத்தான் பாலினத்தின் சிக்கலாக தன்னிலையின் உருவாகலாக தொடரப்படுகிறது. மழலை பேசும் சிறுமியின் தாயாக மாற்றமடையும் அடையாளம் தன்னிலையை சங்கேதப்படுத்துகிறது.  எதிர் பாலுறவின் அடிப்படையில் உருவான தன்னிலை ஆண்மையின் அடிப்படையில் பெண்மையை முன்னிலைப்படுத்துகிறது. அண்ணன், தம்பிகளுக்கும் அக்கா, தங்கைகளுக்கும் என்று உறவுகளுக்கு இடையில் பாரபட்சம் காட்டப்படும் உடல் முன்னுரிமையின் அடிப்படையில், சிறுமியின் உடல் பெண்ணின் உடலாக விதிகளின் அடிப்படையில் முன்தீர்மானிக்கப்பட்ட விதிகளின் உடலாக மாற்றம் பெறுவது படைப்பின் சிறுகளமாகிவிடுகிறது[5]. பெண் தன்னிலை தன்னை தானாக முன் நிறுத்துவது மற்றமையின் விருப்பத்திலிருந்துதான். தாய், மகள், சகோதரி, மனைவி என்று உறவின் பாற்பட்ட தன்னிலையாக இவற்றிலிருந்து பிரிந்து செல்லும் பிளவுறும் தன்னிலையை காணவேண்டியதாக அலைவுறும் புள்ளிகளில் நிலைபெறுவதாக கொண்டுவிட, படைப்பில் கண்டுவிடத்தான் பொருளாம்சத்தை தேடவேண்டியிருக்கிறது.

  

---

[1] Judith Butler, Bodies that Matter On the Discursive Limits of Sex

[2] The problem is not that the feminine is made to stand for matter or for universality; rather, the feminine is cast outside the form/matter and universal/particular binarisms. Judith Butler, Bodies that matter On the Discursive Limits of Sex P.42.

[3] சகீனாவின் வளையல்கள்-ஜாஹீரா சையது,ஆப்கானிய சிறுகதை மொழிபெயர்ப்பில், திண்ணை இணையதளம்

[4] பெருந்தேவி கவிதைகள்

[5] வசியம்- காஞ்சனா தாமோதரன் சிறுகதை-திண்ணை இணைய தளம்

மந்திரச்சிமிழ்-இதழ் 7-10 ஏப்ரல் '11-மார்ச் '12 இதழில் வெளியான கட்டுரை 

   

  

Bibiliography

1.Judith Butler-Bodies that Matter On the Discursive Limits of Sex

2.Virpi Lehtinen-Luce Irigary's Philosophy of Feminine Being:Body, Desire and Wisdom

3.Ian Buchanan and Claire Colebrook(Ed)-Deleuze and Feminist Theory

4.Chrysanthi Nigianni and Merl Storr(Ed)-Deleuze and Queer Theory

5.நீலி-மாலதி மைத்ரி கவிதைகள் தொகுப்பு, காலச்சுவடு பதிப்பகம், 2005

6.காலச்சுவடு இணையதளம்

7.திண்ணை இணையதளம்

8.இன்னபிற வலைப்பூ

9.குட்டிரேவதி கவிதைகள் வலைப்பூ

10.சங்க இலக்கியம்-தமிழ் இணைய நூலகம்.

பெண்:புராணம்-பிளவு-தன்னிலை:பகுதி 1

பெண்:புராணம்-பிளவு-தன்னிலை:பகுதி 2

பெண்:புராணம்-பிளவு-தன்னிலை:பகுதி 2

2.பிளவு

எதிர்பால் பிளவு இருமைகளின் நிகழ்வை நெறிமையாக்க லிங்கமையமொழியின் அபிநயம். தலையில் மழை துளிகள் விழுந்ததால் பேரொலி எழுப்பும் அரவம் போல் பாலியல் விழைவின் ஒப்பிடல்[1]. இல்லை எனில் மெய் மலிந்த காமம் என்று மிகை கொள் போக்காக நிலைப்பு. ஆண்மை/பெண்மை என்ற இருமைகளில் காணாமல் போகும் பெண்மையும் மேலதிக பெண்மையுமாய். ஆண்மையின் ஊடுருவலாய் பெண்மையை லிங்கமையமொழி பின்னி, தாய்/கொள்கலன் என்ற மேலதிக பெண்மையை நெய்யும். ஆயமும் ஊரும் கோவலரும் வடித்தெடுத்த பெண்மை மொழிவது காமத்தின் மொழி அல்லது பேரார்வமான பாலியல் விழைவு. அறத்தின் நிலைபேறாக இருப்பதும் வேட்கையை ஆட்டுவிப்பதும் என பல பூணுதல்களைக் கொண்டிருப்பதால் ஆண் உடலின் தேடலில் பெண்மையை விளைவித்திருக்கும் லிங்கத்தை ஊடுருவக் கோருவதாக சிருங்காரச் சுவை கூட்டும். தோலின் மெய்ப்பாடுகள் துலங்கும் சிலிர்ப்புகளை பெண்மையின் குறித்தலில் சேர்த்து இரங்குதலையும் பிரிதலையும் புணர்தலையும் பொருள் கொள்ள வைக்கப்படும். அல்லது உறையிலிடாத உப்பாய் கரையும் முத்தமாக சேர்க்கப்படும்[2]. காணாமல் போயிருக்கும் பெண் உடலாய் மொழி பேசி பெண்மையின் நிழலாட. தோலில் நிலைபெறும் உடலாய் பாவித்து பாலியல் சமைக்கும் பண்டமாய் பிரவாகிக்கும். சிறைபட்டிருக்கும் உடலில் சிறைபட்டிருக்கும் பெண்மையாக தோலின் நிலையை அறிவித்து நிற்பதாக படிக்கப்படலாம். பூக்காத உடல் பெண்மை கொண்டதாக சிறைபடாதிருப்பதும் தனிக்காட்டு மானாய் தொலைந்து போவதும் முன் தீர்மானிக்கப்பட்டதாவும் இருக்கலாம்[3]. ஆணின் பெண்ணாக ஆணின் பிரதிபிம்பமாக உருவற்ற ஒன்றாக, நீர்மமாக, கொள்கலனாக, உணர்வாக, தாய்மையாக, செவிலியாக பாத்திரமற்றவளாக பிளவுறுவதுதான் நிகழ்த்துதலாக இருக்கிறது. மனம் எனும் உடலையும் உடல் எனும் மனதையும் இணைத்திருப்பதில் பெண்மையின் நிகழ்வு நிகழ்த்தப்படுகிறது. ஆண் உடலின் தேவை போல் பெண் உடலின் தேவையை வர்ணிப்பதும் சமநிலையாக விடுதலையை பாவிப்பதும் விடுதலையாக இருப்பது உடலின் எல்லை மீறலாக புனைவதும் பாலின பிளவை பெரிதாக்குவதும் லிங்க மைய மொழி அமைப்பாகக் கொள்ளப்படலாம். பெண்மைக்கான உடல் என்று பிளவு எப்படி நிலைபெற்றது என்றும் பெண்மையின் உடல் பெருமையாக அல்லது தோற்றத்தின் நிலைபேற்றாக அறத்தின் சார்பில் விளைந்த பிளவாக தோற்றம் கொள்ள வைப்பதும் இருமை பண்புகளின் முடிந்த முடிபுகளாக மாறிப் போகலாம். மீமெய்யியலிலிருந்து உருவான பிளவுதான் என்றோ அல்லது உள்ளீட்டின் ஒரு வடிவம் என்றோ கொள்ளத்தான் உடல் வேறுபாடு உறுப்புகளின் வேறுபாடாக கொள்ளப்பட்டும் இருக்கும். மறு உற்பத்தி உடல் என்ற உணர்வு கொண்ட உடல் இப்படி பிளவை சாத்தியப்படுத்துகிறது வரலாற்றின் அடிச்சுவட்டில் சிக்கி. சிறைபட்டிருக்கும் பாலினத்தில் சிறையான உடலாய் பாவிக்க.

தாய்மை/பராமரிப்பவர் என்பது மனித வடிவத்தை ஒப்புமை கொள்ளும் உருவகம் அல்ல. ஆனால் அது மனித எல்லையில் உருவான  விதிகளுக்குட்பட்ட ஒரு வடிவமற்ற, வடிவமற்றுப் போவதான அச்சத்தைக் கொண்டது. அது ஒரு வடிவமோ அல்லது உருவோ அல்ல அதனால் அது ஒரு உடலே அல்ல .[4]

சான்றோனாக்கும் தாயாக குழந்தையை போர்க்களம் அனுப்புபவளாக கொள்கலனாக நிரப்பப்படும் நிறையாக இல்லாத குறையாக உடல்சார் உற்பத்தியின் எந்திரமாக இருப்பதாக முன் தீர்மானத்தை ஏற்று பெண்மையை நவில்ந்துவிடும் போக்கும் இருக்கும். பரிகாரமாக இருப்பதும் உடலின் பலவகையான போலச் செய்தல்களாகவே இருக்கும். நளினத்தின் தேர்வில் பகடி செய்வது மட்டுமே உரித்தானதாக மாற்றப்பட்டிருப்பதால் தாய்மையின் அரங்கேற்றமும் மீள் உற்பத்தியும் பூமாதேவியின் வாழ்தல் என, அடிவயிற்றுக் கோடுகள் என முட்டை இடுவதை கற்பனை செய்வதைப் போல இங்கு போன்மைகள் நிகழ்த்தப்பட்டிருக்கலாம்[5]. ஆண் உடலின் கிளையாய் பரவி நிற்கும் பெண்மையை விதிகளுக்கு உட்பட்டு நிகழ்த்தவைக்கும் படலம் வனபேச்சியின் காட்டை ஈன முடியாத வதைக்கு உட்படுத்துகிறது[6]. நிலைக்காத ஒருவன் உடன் அழைக்காத ஒருவன் கரம் பற்றி கருவறை தாண்டுவதும் ஆணின் பெண்ணற்றதும் ஆணின் பெண்ணானதுமான விளையாட்டின் ஒரு படி. பெண்ணின் உருவாகுதலாக இருக்கும் இடத்தில்தான் பெண்மை எனும் பாலினத்தை ஊன்றிவிட்ட புள்ளியாக கொண்டுவிடலாம்தான்[7]. 

பிறழ்ச்சிப் பெண்மை, அன்புக்குரிய பெண்மை, மாயப்பெண்மை என்று பெண்மையை ஆணின் பெண்ணாக வகைமைக் கொண்டுவிடலாம்[8]. பிறழ்ச்சிப் பெண்மையின் பாலியல் விழைவுகள் ஆணின் பெண்மையாக இல்லாத நிலையின் வெளிப்பாடாக இருக்கலாம். உயவு நோய் அறியாது துஞ்சும் ஊரின் மீது வெறுப்படைந்து தாக்கும் பாலியலை வெளிப்படுத்தும் பிறழ்வுற்ற செயல்முறையாக புனைவு உரைக்கப்படுகிறது[9]. சிதறி பிறழ்ந்து பொழியும் விருப்பத்தின் முதிர்வை சொல்லிச் செல்லும். காமத்திலும் காயத்திலும் புரண்டு கோடையின் சுழலாய் இசை மேலெழும்புகிறது[10], விருப்பமாக. சிறைப்படுத்தலின் விதிகளை மீறி எழுந்த இசையாய் விருப்பம் அறிவிப்பது ஒழுங்கின்மையை. பாலியல் ஒழுங்கின்மையை. பெண்மையின் வகைமைகளாய் போலச் செய்து கொண்டிருக்கின்ற லிங்கமையத்தின் சொல்லாடலில் மாற்றை மற்றமையை இன்மையாக பொருளாம்சம் கொள்ள வைப்பதில் சிக்கல் கொண்ட பாத்திரமேற்பு பரிதவிக்கிறது. முடமாவதிலும் முடங்கிப்போவதிலும் பெண்மையின் மொழியை தேடி நிறுவி விடுவது பெண் உருவாகுதலின் ஒரு பகுதியாகிவிடலாம். மூதுரைகளின் பிடியிலும் அறவரிகளின் நிலைப்பிலும் பெண்ணாக உருமாறுவது ஆணின் பெண்ணாகத்தான். பெண்ணை பெண் பதிலி செய்வதும் உடல் பொருளாம்சத்தால்தான். ஒரே வார்ப்பிலான பெண்மையின் ஸ்தானத்தை விதிபலனாய் முகிழ்த்த மொழியாம்சத்தின் உட்பொருளாக பதியவைப்பதும் நடக்கிறது. உடலின் பிறப்பை விட உருவாக்கப்படுவதுதான் பாலினத்தை முற்ற வைக்கிறது என்பதில் நிகழ்த்துதல் மாய வலையாக பின்னப்படுகிறது. பெண்மையின் மொழிதலாக விருப்பம் அழுத்தப்படுகிறது. கண்காணிக்கப்படுகிறது. ஒடுக்கப்படுகிறது. நோய்மைப்படுகிறது.

பெண்மையின் குணாம்சங்களாக அடைக்கப்பட்டவை இடம்பெறும் இடமாக கொள்கலன் இருக்கும். பெண்மை, தாய்மை மற்றும் பராமரிப்பை எதிர்க்கிறது. இந்த பெண்மை எனும் குறியின் கீழ் வரும் எல்லா விலக்கப்பட்டவைகளின் எச்சங்களையும் இந்த கொள்கலன் என்பது நிகழ்த்தி, நடித்துக் காட்டுகிறது அதனால் இந்த கொள்கலன் என்பது ஒரு பிரதிமை ஆகிறது. ஆனால் கொள்கலனை சாதாரணமாக எளிமையாக பிரதிமை என்று கொள்ளமுடியாது, அழைக்க முடியாது. ஏனெனில் பெண்மை சிலவற்றை விலக்கிவைக்கிறது எதிர்க்கிறது விலக்கப்பட்டவற்றின் எச்சங்களை வெறுமனே நிகழ்த்தி அல்லது நடித்துக் காட்டுகிறது அது எந்த பாத்திரத்தில் நடிக்கிறதோ அல்லது நிகழ்த்துகிறதோ அதை ஒரு படிமமாக கொள்ளலாம்.[11]

அன்புக்குரிய பெண்மை என்பது பெண்ணை உடலாக பதிலி செய்யப்படும் உடலாக பாவித்துக் கொள்ளும் மொழிதலில் கட்டமைக்கப்படுவது. குடும்பத்தை உடைப்பதில் ஒழுக்கத்தின் நிலைப்பாட்டை மீறாமல் இருக்கும் உடலாக விழைவை முயங்கச் செய்வதில் அன்புக்குரிய பெண்மை மருளுகிறது. மருட்டப்படுகிறது.

மாயப் பெண்மை, இறையை விருப்பத்தின் வெளிப்பாடாய் மோகிப்பதாக இறையாய் விருப்பம் மயங்குவதாக நிலைப்படுத்தப்படுகிறது. கற்பூரமும் கமலமும் பவளச் செவ்வாயும் நாறுவதும் சுவைப்பதும் இறையில் சங்கமிக்கும் விருப்பத்தின் நுகர்வு[12]. இறையாய் லிங்கமையத்தை மேம்படுத்துவதும் அதன் பால் அருளாய் காதலைப் பெறுவதும் மாயப்பெண்மையின் வாழ்நிலை. தூய பக்திக்கு கிடைக்கும் தூய காதல் என்பதாகவும் தூய பாலியல் என்பதாகவும் பொருளாம்சம் விரிவுபடுகிறது. இறையின் அறிவில் மெய்மறந்து மெய்யை மறுத்து ஆண்மையின் உயர்வாய் கொண்டு மெய்ப்பொருளாய் கண்டு உய்வித்துவிடும் பெண்மையும் உண்டு. ;மாயப்பெண்மையின் இறை லிங்கமையத்தின் மீதான விருப்பத்தேர்வு லட்சிய ஆண்மைக்கான அவசியத்தை வலியுறுத்துகிறது. லட்சிய ஆண்மைதான் மாயப் பெண்மையை வரையறுக்கும். துறவின் வழியில் வற்றிவிட்ட பெண் பாலியலாகவும் அல்லது பேயாகிவிட்ட பெண் பால் உடலாகவும் வர்ணிக்கப்படலாம்.

'நீ என்னுள் இல்லை. நான் உன்னை என்னுள் கொள்ளவில்லை. என் வயிற்றில் என் கைகளில் என் தலையில் வைத்திருக்கவில்லை. என் நினைவில் என் மனதில் என் மொழியிலும் வைத்திருக்கவில்லை. நீ இருக்கிறாய் என் தோல் போல்'[13] என்ற தோலின் வரையறையாக பாலின சங்கமிப்பு அடிக்கோடிடப்படும். தோலின் சதையின் இளமையின் கறையை வற்றிவிட்டு எலும்பின் பாலியல் இன்பத்தை பெற பேயாவதாக, ஏக்கத்தில் இருக்கும் அருள் எனும் இன்மையை அடைய விரும்பும் உடலாக மாறுவதும் வரலாறாகிறது[14]. உண்டிச் சுருக்கி அழகு பெற்று சொற்திரம்பாத கற்பைக் கொண்டு மரணத்திற்கு சமமான அடக்கத்தையும் மானத்தையும் பெற்று சிறையின் விதிகளில் சிறைபட்டு நிற்கிறது பெண்மை என்ற பால் மறைந்த அதீத புனைவின் மறுபெயர்[15].

மந்திரச்சிமிழ்-இதழ் 7-10 ஏப்ரல் '11-மார்ச் '12-ல் வெளியான கட்டுரை

---

[1] ஔவையார் பாடல் நற்றிணை 129, 187

[2] உறையிலிடாத முத்தம்-சுகிர்தராணி கவிதைகள்-காலச்சுவடு

[3] அம்பையின் காட்டில் ஒரு மான் சிறுகதை-திண்ணை இணைய தளம்

[4] This receptacle/nurse is not a metaphor based on likeness to a human form, but a disfigu-ration that emerges at the boundaries of the human both as its very condition and as the insistent threat of its deformation; it cannot take a form, a morphe, and in that sense, cannot be a body.-Judith Butler, Bodies that Matter  On the Discursive limits of Sex P.41

[5] பூமாதேவி-நீலி,மாலதி மைத்ரி கவிதைகள் தொகுப்பு. ப 28

[6] வனப்பேச்சி-மாலதி மைத்ரி கவிதைகள்

[7] கருவறை-குட்டிரேவதி கவிதைகள்

[8] Virpi Lehtinen-Luce Irigary's Philosopy of Feminine Being:Body, Desire and Wisdom, P.65

[9] ஔவையார் பாடல் குறுந்தொகை 8

[10] ஒரு துளி இசையும் ஒரு பாம்புச்சட்டையும்-சுகிர்தராணி கவிதைகள்-காலச்சுவடு

[11] the receptacle is not simply a figure for the excluded, but, taken as a figure, stands for the excluded and thus performs or enacts yet another set of exclusions of all that remains unfigurable under the sign of the feminine—that in the feminine which resists the figure of the nurse-receptacle. Judith Butler, Bodies that Matter On the Discursive limits of Sex, P.42

[12] ஆண்டாளின் திருப்பாவை

[13] You are not in me. I do not contain you or retain you in my stomach, my arms, my head. Nor in my memory, my mind, my language. You are there, like my skin." Luce Irigary, Speculam of the Other Woman P.37

[14] காரைக்காலம்மையார், திருப்பதிகம்

[15] ஔவையார் ஆத்திச்சூடி.

பெண்:புராணம்-பிளவு-தன்னிலை:பகுதி 1

பெண்:புராணம்-பிளவு-தன்னிலை:பகுதி 3

பெண்:புராணம்-பிளவு-தன்னிலை:பகுதி 1

பெண்மையை பெண்ணை பெண்ணாய் பெண் பாலியலை பெண் பாலினமாய் பெண்மையத்தை பெண்ணாக உருவகித்த பெண் நிகழ்த்துதலை பெறற்கரிய பெருமையை பெற்றடைவதை செய்வது இங்கு தொழில். "புதுமை'' அடைமொழியுடன் உலா வந்ததில் கிடைத்த புத்தாடைகளும் புதுவேலைகளும் புதிய கதைகளும் மாற்றை மற்றமையை புதுப்பித்துக் கொள்வதற்கான ஒரு நிகழ்வாக இருந்தன. ஏனெனில் உடல்கள் பொருள்கொள்ளப்படுகின்றன. உயிரியலாக இல்லாமல் உடல் பொருளியலாக.

1.புராணம்

எலும்பின் எலும்பாகவும் சதையின் சதையாகவும் ஆதிக்கதையில் பிறந்துவிட்டு ஆப்பிளைத் தின்றவளாக இனி ஒரு போதும் திரும்பாத இருண்ட நிலத்திலிருந்து விலகுவதற்கு தன்மையின் இடச்சொல்லை இழந்துவிடவேண்டி வந்தது[1]. நீருக்குள் மேகத்திரள் போல் மிதந்துவரும் விண்செருகவைக்கும்  காதலாக அல்லது தேசத்தின் தகுதிவாய்ந்த இளவரசருக்கு பெண்களின் பிரதிநிதியாக மாறி காதல் கடிதம் எழுதும்[2] மதர்த்த குதிரைகளை அடக்கிக்கொண்டிருக்க ஓடும் ஓட்டமாக அந்தக் காதல், அவளின் காதலாக இருக்கலாம்[3]. இதயப் படங்களை வரைந்து அதிகாரத்திடம் முழுமையாக சரணாகதி அடைந்து வர்ணிக்க முடியாத இன்பத்தின் பிடியில் சிக்கி கண் மயங்க சொல் குழற கடிதப் புனைவும் காதல் முனைப்பும் தடுமாறும் சுயத்தின் பிறழ்வாய் நீள[4]. இன்னும் எழுதப்படாத கடிதங்களுக்கு பிரதிநிதித்துவமாக இருக்கும் எழுத்தை வடித்து புரட்டலில் இணைக்கப் பயன்படும் பிரதிகளாய்த் தொல்கதைகள்.

காமத்தின் புராதனக் கோயிலான தன்னிடம், பெண்ணிடம் அற்புதத் துளியை சிந்தும் உடலுக்கான தேவையை முன்வைப்பது எதிர்ப்பின் சின்னமாகப் பார்க்கப்படலாம். இருபால் விழைவின் பாலியல் சேர்க்கைக்கான அதிகாரத்தை போற்றி துதிக்க வழிபடும் இடத்தில் வழியும் சுண்ணமும் சாந்தும் பிளவில் கிளைபரப்பி தீமுட்டுகின்றன[5]. மீண்டும் ஒரு மாயத்தில் இழந்த தம்முடைய தன்னிலையாக இளநங்கையும் இளநம்பியும் காதலை புல்மாலையிட்டு செல்லும் தொன்மத்தை நிகழ்வாக மாற்றி நிற்கிறது பாலியல் விழைவு[6]. உப்பையும் விட சுவைக் கோரும் உதட்டையும் புல்லின் இழைகளை விட நெருக்கமாய் பின்னி இடம் மாறி அடையாளம் குலையும் நீயும் நானும் என்ற முன்னிலை தன்னிலைகளாய் பாலியல், புராணத்தில் கலந்திருக்கிறது[7].

பால் கலந்த பால்களாக இருப்பினும் பால் வெளிப்படுவதில் விதிகளுக்குக்குட்பட்ட புராணம் நெஞ்சு நேர்பவளாகவும் இம்மையிலும் மறுமையிலும் ஒரே கணவனை ஒரே துணையை ஒரே உடல் இணையை பெற்றவளாகவும் இருப்பதாகக் கட்டப்படுகிறது[8]. கள்ளின் சாடி போல் இளமை கொண்டவளை அழுகி உருக்குலைந்து முதிர்ந்து போவதான நிலையைக் கொடுத்தவனை வாழ்த்தி அல்லது சபித்து ஒலிக்கும் அதீதகற்பனை, மற்றமையாக புனைந்துரைக்கப்படுகின்றது[9]. குறியாக ஆணும் குறியாக பெண்ணும் பெயரிட்டவையாக புரிதலில் மாயமாய் புதிர் கூட்டத்தில் புணர்ந்தவிழும் பிரம்மமாய் பொருள் கொள்ளும் தொன்மமாய் தன்னிலை தெளிவுபெறும்.

வள்ளைப் பூவைப் போல் மயங்கி வதுவை அயர்ந்து தொடி நெகிழ்ந்து வண்டுகள் துளைக்கும் தாமரை போல் பொது உடலாகி கவர்வதில் மகிழ்வதும் கவர்ந்ததில் தியங்கி உடல் பொருளியலை புராணமாக்கும்[10]. கண்ணாய், கனியாய், இதழாய், இன்னும் பிற உடல் உறுப்புகளாய் பதிவு செய்து மெய்யின் மெய்களை பாலினமாய் பாலின் மையமாய் மாற்றி சட்டகத்தில் மாட்டி, விடுபடாமல் விடுதலையை வேண்டி, தொன்மத்தின் குணாம்சமாகிப் போகும். தூய உடல், தீண்டா உடல், மெய்யுடல் என புனிதத்தின் சக்கரத்தில் அச்சாணியாக்கி லிங்கத்தின் மேன்மையைப் பேணி தொல்கதை காவியமாகும். தெய்வமும் இறையும் பெண்ணில் உறையும் பொருளாவதற்கு. பெண் பாலியல் தன்னிலை மலராய் மதுவாய் அன்னமாய் அன்றிலாய் பேரானந்தத்தில் திளைக்க. தூய்மையை புனிதத்தை கைக்கொள்ளாத உடல் பிறழ்வை, பித்தை, வெறியைக் கொண்டதாக பாவிக்கும் தொன்மங்கள். பொது உடல் போல் பொது மொழி பெறா ஊமையாய் கடன் பெற்ற சுமையின் படிமங்களைக் கொண்டு பரிதவிக்கும் இயல் மொழியில் பற்றினை உரைக்கும் தொல்கதை.

பெண்மையை விவரித்தால் தன்னிலை தேடும் மரபில் மிக ஊர்ந்து உடைகளின் இறுக்கத்தில் அலங்காரங்களின் பிடியில் சிக்கி ஒற்றை கொள்கலனாய் மிதக்கும் ஓர் உயிரியின் இனமாய் கதை சொல்லலாம். சிற்றடிகளின் தடங்களையும் மின்னொளிகளில் பரவசத்தையும் மிகப்பெருக்கி தியாகத்தின் வெம்மையில் பூத்து கண்ணீர் உருக்குதலும் பழிதீரா துயர் கலந்து பலவீனத்தை பறைசாற்றி பற்றினை புராணங்கள் தோறும் சுவைக்கலாம். கணி மென்துறையும் துல்லியமாய் வரைந்தெடுத்த பொதுப் பண்புகளோடு மெய்யுரையும் சீரிய மாண்புகளை புனைந்துரைக்கும் தொல்கதையை முனைந்து அடுக்கும் முறைமைகளை கோட்பாடுகளின் நவிற்சியோடு பொழியும். ஏனெனில் கவியும் புனைவும் பொருளாம்சத்தில் இயங்குவது புதிர் இன்றி புகையும் சொற்சிலம்பில்தான் என்பதே புராணத்தில் கடைந்தேறுவதாகிறது.

மரப்பாச்சிகளின் உணர்வுகளை மென்பொருளாய்க் கொண்டு வன்கதைகள் கட்டப்படலாம். உடல் உறுப்புகளை மையமிட்ட மொழியாடல்கள், வர்ணனைகள் பெண் கதைகளாக உருமாற்றம் பெறும். மைய உடல் என்ற உடலிலிருந்து உறவாக உருமாறும் கதைகளிலிருந்து ஆட்படுத்தப்பட்ட தன்னிலை உருவகத்தை மீண்டும் மீண்டும் மறு ஆக்கம் செய்து கட்டுடைத்து மனோவியல்புகளை பெற்றெடுக்கும் பூர்வகதையின் மறுபக்கமாய் பொதித்து வைத்த சித்திரத்தின் வடிவை கோர்த்த புராணமாக்கிவிடலாம். உடலின் மனமாய் மனதின் உடலாய் வடிவெடுப்படுப்பதில் இரட்டைகளின் ஒருங்கிணைப்பு சிதற பன்மைகளின் விரிவாய் மாற புராணம் மாற்றி எழுதப்படவேண்டும்.

சாதிகளும் மதங்களும் காதலின் தடையாய் உடல்களின் தடையாய் மாறி நிற்பதில் ஒற்றை பாத்திரமேற்பு தட்டை பாத்திரமேற்பு கொண்டுவிடுவதில் புராணம் பழங்கதையாகவே இருக்கிறது. இல்லை எனில் சமானமற்ற பாலின புனைவை நூல்களாக தொகுதிகளாக பகுத்து பறைசாற்றும் புராணத்தை கைக்கொள்ளலாம். மதிப்பற்ற உயிரின் விலையை கோர செயற்கரிய செய்யும் அல்லது கொலை புரியும் கதைக்களன்களில் நின்று நிலை பெற்று தொன்மங்களை கட்டவிழ்க்கலாம்.

மந்திரச்சிமிழ்-இதழ் 7-10 ஏப்ரல் '11-மார்ச் '12ல் வெளியான கட்டுரை

---

[1] ஆப்பிளைத் தின்றவள்-நீலி-மாலதி மைத்ரி கவிதைத் தொகுப்பு.ப27

[2] Fida factor: Rahulji, will you be my Valentine?-ஷோபா டே எழுதிய கடிதம், பிப்ரவரி 2011.

[3] என் காதல்-குட்டிரேவதி கவிதைகள்

[4] அபிகேய்ல் ஆடம்ஸின் காதல் கடிதங்கள்

[5] காமத்தின் புராதனக் கோயில்-சுகிர்தராணி கவிதைகள்-காலச்சுவடு

[6] April Aubade, 1955. சில்வியா ப்ளாத் கவிதைகள்-நாகார்ஜுனன் மொழிபெயர்ப்பு

[7] ஒரு காதல் கவிதை-பெருந்தேவி கவிதைகள்-இன்னபிற, வலைப்பூ

[8] ஔவையார் பாடல், குறுந்தொகை 9

[9] ஔவையார் பாடல், நற்றிணை 295

[10] நக்கண்ணையார், அகநானூறு 252

பெண்:புராணம்-பிளவு-தன்னிலை:பகுதி 2

பெண்:புராணம்-பிளவு-தன்னிலை:பகுதி 3